Nagsagawa ng huling paghahanda si Pangulong Ferdinand Marcos Jr. para sa kanyang ikalimang State of the Nation Address (SONA) na nakatakdang ihatid sa harap ng pinagsamang sesyon ng Kongreso ngayong Lunes, Hulyo 27.
Nagbahagi ang Pangulo noong Linggo ng isang 23-segundong video kung saan makikitang nagsasagawa siya ng rehearsal para sa kanyang talumpati. Naglabas din ang Presidential Communications Office (PCO) ng ilang larawan na nagpapakita ng kanyang paghahanda para sa taunang ulat sa bayan.
Ayon sa Malacañang, isinasagawa ni Pangulong Marcos ang pinal na paghahanda para sa kanyang ikalimang SONA na gaganapin sa Batasang Pambansa Complex sa Quezon City.
Sa isang ambush interview, sinabi ng Pangulo na magiging sentro ng kanyang talumpati ang mga nagawa ng kanyang administrasyon mula nang ihatid niya ang kanyang nakaraang SONA.
Nang tanungin kung tatalakayin niya ang isyu ng korapsyon sa kanyang talumpati, maikli lamang ang kanyang naging tugon at sinabi sa publiko na abangan ang “susunod na kabanata.”
Samantala, inilarawan ni Palace Press Officer at Communications Undersecretary Claire Castro ang ikalimang SONA ng Pangulo bilang “simple ngunit marangal,” at sinabing layunin nitong maihatid sa sambayanang Pilipino ang isang makabuluhang ulat tungkol sa mga programa at naging accomplishments ng administrasyon.
