DAGUPAN CITY– Arestado diad entrapment operation so sakey ya bii ya manpepeke na pirma na sakey ya punong barangay diad ciudad na Alaminos.
Kinabat so suspek ya si Elizabeth Domondon, 47-anyos, residente na Barangay Cayucay ed abitlan siyudad.
Onong ed saray otoridad, ginawa da so entrapment operation piyan naerel so suspek lapud reklamo nen Barangay Cayucay Captain Ronald Bautista ya uusaren so scanned copy na pirma to diad pangagawa tonya na barangay clearance .
Ginawa so operasyon diad Angel Luisa Gowns for Rent & Beauty Saloon diad Barangay Poblacion, ciudad na Alaminos no iner saya so ituturon lugar ya pangagawaan na suspek na saray barangay clearance ya kakargaan to na kopya na pirma na kapitan.
Matalonggaring so operasyon tan narel so suspek ya kaplesan ya wala la ed kustodiya na saray otoridad.
Akagetar met iyan isegepan na kason Falsification of Public Documents by a Private Individual.
