DAGUPAN CITY– Inatey so sakey ya Pinoy Nurse ya mantratrabaho diad Canada tan manbabakasyon labat diad Pilipinas kasumpalan ya paltogen diad baley na San Manuel, Pangasinan.
Kinabat so biktima ya si Mario Asumio, 61 anyos, nurse diad Canada tan residente na Zone 1, Barangay Nagsaag ed abitlan baley.
Diad initial ya imbestigasyon na saray otoridad, umpapaway ya say biktima so kuwantolan unlugan nen tinundaan na duwaran motorsiklo ya walay lugan ton sandurwa.
Sakey ed saray suspek so linmeksab tan pinaltog so biktima ed nanduruman parte na laman to.
Inawit ni diad ospital so biktima bangbalet saya so indeklaran dead on arrival.
Akabatan ya say biktima so datin medical practitioner diad baley da tan mantratrabaho natan ya nurse diad Canada no iner kakasempet to diad Pilipinas piyan manbakasyon.
