DAGUPAN CITY– Inatey so deputy chief tanod na Barangay Bonuan Binloc diad ciudad na Dagupan kasumpalan ya paltogen.
Kinabat so biktima ya si Jerry Mangsat, 49-anyos, Deputy chief tanod tan residente ng Barangay Bonuan Binloc diad abitlan siyudad.
Diad imbestigasyon na saray otoridad, akaduty so biktima karuman tan bandad alas singko singkuwenta na ngarem saya so inmirong ed sakey ya yurungan diad arap na sakey ya tindaan diad lugar da kaiba so tanod ya kinabat ya si Nestor Querol ya residente met diad abitlan lugar.
Kaleganan ya akayurong so biktima, bigla labat yan pinaltog na sakey ya lakin akalugan diad sakey ya motorsiklo ya imamaneho na sakey ya laki.
Naknad eges to so biktima tan tampol met ya inawit diad ospital bangbalet saya so indeklaran dead on arrival.
Nangawa met na dragnet operation so PNP bangbalet akatakas iray suspek.
Akabatan ya datin drug surenderee so biktima tan wala met laray nanaawat ton death threat balet saya so binalewala to.
