DAGUPAN CITY-Angano kalkalna lan umpapawil so marakep ya kipapasen na panaon diad lugar da, aminado so pigaran OFW o overseas Filipino Workers ya angitilak na baleg ya desyang so Typhoon Mangkhut diad Guam.
Saya so kinompirma diad Bombo Radyo Dagupan nen Anacleto Perillo Teodoro tubon Naguilian La Union tan kaplesan ya manaayam diad Guam.
Onong ed kinen Teodoro, maksil so Typhoon Mangkhut ta baleg so dineral ton imprastruktura tan pampublikon transportasyon ed abitlan lugar.
Maksil maong so dagem ta abuwal iray angkakabaleg ya kiew.
Likod ed saya, impalapag nen Teodoro ya dakel so kaabungan ya aderal tan wala ray kable na kuryente ya atumtumba.
Sa katuwaan to, anggaman say kotse tonya so aga akaligtas ed bagyo ta natnatsit kayarin apataan na sangay kiew.
Kaleganan tonya, baleg ya parte na Guam so man-aalagar ni anggaad natan na power re-connection kayarin naandian ira na silew lapud samay bagyo.
Diad kaplesan, kalkalna metlan unaagew diad abitlan lugar ya sikatoy baleg dan pisasalamatan.
