DAGUPAN CITY– Malet ya kokontraen na pigaran grupo daray managsigay diad Pangasinan so proponin pan-import na saray sira ya manlapud arum ya bansa.
Onong ed kinen Pablo Rosales, Presidente na grupon Pangisda Pilipinas, kakasumpal ni so graben kalamidad ya akaapekton maong ed anapan na saray angkekelag ya managsigay bangbalet natan wala lamet so pasimbalon problema ya nakaokolan ya arapen na sektor da ta labay na gobyerno ya man-import na saray sira singa say galunggong.
Para ed sikara, agga prioridad na gobyerno iray alaan na sira diad bansa ta akapokus ira ed say pan angkat na sira.
Imporek nen Rosales, ya mayaman ed siran galunggong so Pilipinas kanyan agga la nakaokolan ya man-import ni manlapud arum no ingen mas marakep no pantuunan na imano no antoy mas maong ya gaween piyan naitdan na suston atensyon so likas ya yaman ya nayarin pinabangan na saray angkekelag ya sumisigay.
Kapigan labat, inaprubaan nen Agriculture Sec. Manny Piñol so pan-angkat na bansa na 17 metric tons na galunggong ya unsabi ed sayay Setyembre 1 anggad Disyembre 31 kasumpalan ya angipaway si Piñol na certificate of necessity.
