DAGUPAN CITY– Napapagaan natan so pigaran opisyal ed intagey natan na kaso na dengue diad luyag na Pangasinan kabiangan dia so ciudad na Dagupan kasumpalan na ngalngalin duway simban delap.
Onong ed datos na Pangasinan Provincial Health Office, manlapud January anggad July 26 na kaplesan ya taon, inmabot so kaso na dengue diad probinsya na 2,589, mas atagey ya 99 percent kumparad 1,303 cases ya naikurit ed parehon panaon nen 2017.
Diad eksklusibon impituyaw na Bombo Radyo Dagupan ed kinen Dagupan City Councilor Dennis Canto, Committee Chair on Health, impalapag tonyan manliliber ira natan diad saray barangay diad ciudad piyan panonotan iray residente ya manlinis ed kaliber liber piyan makaiwas ed sakit ya dengue.
Mas delikado met kasi inkuwanto natan ta anggapo la so pipiliin ya panaon na makapatey ya sakit.
Papayuan to met iray totoo ya manpanengneng diad doktor no makakalikna la na pigaran agew ya panpetang.
