DAGUPAN CITY-Malet ya ipapatonton na Dagupan City PNP so panerel tan pansita ed saray residente na ciudad ya akatambay diad kalsada.
Diad eksklusibon impituyaw na Bombo Radyo Dagupan ed kinen PSupt John Dale Sulit, hepe na PNP Dagupan, inkuwanton walay naawat dan memorandum ya nanlapud Regional Office kanyan tampol dan impatonton ya nanresulta na impakasita ed unsulok unkulang 100 ya totoo tan initdan iraya na warning na kapulisan.
Inkuwanton, warning ni labat so inter ed sikara pian naipasabi ed totoo so malaknaban ya implementasyon na say panerel ed saray tambay.
Mainumay met ya naantaan no siopa ray akatambay labat tan anggapoy gagaween diad kalsada diad ciudad.
Onong ed City Ordinance ya Artikulo Bente uno, bawal so menor de edad ya mantambay diad paway, man inom tan manlakseb piyan naiwasan iray insidente na robbery hold-up, trouble incident tan snatching.
