DAGUPAN CITY– Apili lamet bilang Vice President na World Health Assembly o WHA si Department of Health o DOH Secretary Francisco Duque III.
Diad eksklusibon impituyaw na Bombo Radyo Dagupan ed kinen Sec. Duque, maliket yan impalapag ton mikaduwa la iyan pankanawnawan apili bilang Vice President na WHA tan say plimiro so nen sikato ni sekretaryo na Departamento na Abig Laman nen taon 2005-2010.
Inkuwanton sikato ni labat so amiduwan pankanawnawan nagmaliw ya Health secretary tan amiduwan pankanawnawan nagmaliw ya Bise Presidente na WHA ya sikatoy decision-making body na World Health Organization.
Ginawa so 71st Session na World Health Organization’s (WHO) World Health Assembly (WHA) diad Geneva, Switzerland nen May 21-26, ed sayan kaplesan ya taon.
Saya so pandaragop na saray ministers o secretary na Abig Laman diad interon mundo no iner dia da ipapanonot ya nakaokolan ya ikurang so universal health coverage piyan nawalaan na PhilHealth security iray totoo.
