DAGUPAN CITY– Ipatonton la natan ya bolan na Hunyo so libren tuition tan miscellaneous fee para ed saray estudyante na State Universities and Colleges (SUCs), Local Universities at Colleges (LUCs) tan saray Technical-Vocational Institutions (TVIs).
Saya et kasumpalan ya impaway na Commission on Higher Education (CHEd) so implementing rules and regulations (IRR) diad pangipatonton na Universal Access to Quality Tertiary Education Act of 2017.
Onong ed kinen Sir Danilo Bose, Spokesperson na CHED Region 1, diad ley anggapo so bayaran ya tuition tan miscellaneous fees iray estudyante ya kabiangan ed State Universities and Colleges (SUC), anggan saray CHEd-recognized Local Universities and Colleges (LUC).
Inyarum nen Bose, pian magmaliw ya kwalipikado ed libren matrikula tan miscellaneous fee, nepeg makapasa so estudyante ed admission tan retention requirement na eskuwelaan.
Inyarum to nin anggapo la so income requirement ya nakaokolan piyan magmaliw ya kwalipikado ed libren matrikula.
Kaleganan tonya, kabiangan ed saray unibersidad ya walay libren tuition tan miscellaneous fee diad luyag na Pangasinan et say Pangasinan State University (all campus), Urdaneta City University tan University of Eastern Pangasinan diad ciudad na San Carlos tan Binalonan.
