DAGUPAN CITY– Nansumpal ed ermen so maliket ya impasyar diad Bonuan Tondaligan Beach diad ciudad na Dagupan so duwaran bisitan saninaro kasumpalan ya sakey ed sikara so nalner.
Kinabat so inatey ya si Deniel Cartagena, trentay dos anyos, sakey ya security guard tan residente na Dona Carmen, Quezon City.
Onong ed impormasyon na PNP, kaiban sinmabi diad Dagupan na biktima so inaro toyan si Twity Candy Mateo, bente kwatro anyos, residente na Bagong Silang, Caloocan City.
Pigaran minuto so linmabas, nanames so duwara balet anengneng labat ira na saray totoon wadman ya sikara lay nalelener.
Tampol met iran tinolongan tan nailigtas so bii balet indeklaran dead on arrival diad patambalan so inaro to ya akabatan ya agla uniingas nen saya so nisakbit diad gilig na dayat.
