DAGUPAN CITY– Aga inilaluan na pigaran high school students ya maermen so kasumpalan na outing
da nen inatey so sakey ya kaiba da legan ya nailigtas so duwaran kaklase ya ginetman iligtas komon eya diad Brgy. Toledo, Silang, Cavite.
Kinabat so inatey ya biktima ya si Carlyn Mae Tan, 14 anyos.
Onong ed nalan impormasyon na Bomboradyo Dagupan nantagar so sangkakaaro ya man-outing ed abitlan ilog.
Bangbalet nen nanpasyan unsempet laraya, nantagar lamet so biktima ya unlusong diad danum, piyan naantaan no panon kaaralem so ilog antes iran unsempet.
Tampol ya tinmaboy tan linmusong diad ilog so biktima bangbalet agla linmutang.
Dia la nanpaga si Mariafe Factor, 13 anyos no iner tinmaboy met iya ed ilog piyan iligtas so biktima bangbalet anggan sikato so aga met tampol ya linmutang.
Lapud saya, tinmombok si Mark Loiz tapian iligtas so duwaran kaklase to bangbalet saya so linmereg metla la diad dalem na danum.
Dia la tampol ya tinmaboy ed ilog so ama nen Mark Loiz ya si Rolando piyan iligtas so taloran ogogaw.
Bangbalet duwaran ogogaw labat so nailigtas to.
