DAGUPAN CITY- Papadisiran ya walad 15,000 totoo so akibiang diad pormal ya inggapo karuman na Region 1 Athletic Association Meet (R1AA) 2018 ya gagaween diad ciudad na Alaminos.
Onong ed kinen P/Supt. Benjamin Ariola, asay hepe ng Alaminos Police Station, diad biek na dakel ya totoo so sansian mareen tan anggapo so naikurit ya gulo diad inpanlukas tonya.
Anggaman kinompirma na City Disaster Risk Reduction and Management Council (CDRRMC) Alaminos ya walay nalmay manlapud Batac City Delegates, tampol met ya min maong so kondisyon to.
Kaleganan tonya, marakep so ginawan parada na saray atleta tan saray delegado makasengeg ed sulong dan yan uniporme.
Say defending Over-all Champion ya Pangasinan II Schools Division, so akasulong na jogging pants tan jacket ya kolor na blue ya walay accent ya amputi tan emben da so banner no iner akasulat diman so inpanmaliw ya Champion da diad R1AA.
Saray delegado ya manlalapud ciudad na Dagupan, ya inibaan nen Dagupan City Mayor Belen Fernandez tan nen City Sports Commissioner Finella Sim, so akasulong na uniporme navy blue ya nan duyaw.
Legan ya say Ilocos Norte ya walaan na sangkarakelan ya delegado ya unaabot ed 992 so akasulong na uniporme ya kolor ambalanga, asul tan amputi.
Say arum niran delegado singa say nanlapud ciudad na Urdaneta so akasulong na yellow green ya nan -accent na navy blue, say San Fernando City delegates so akasulong na amputi ya nan-ambalanga tan asul ya walay asul ya accent ya uniporme, say Candon so akasulong na uniporme ya kolor duyaw tan maroon, Vigan- White Blue tan yellow, Batac -dark orange tan white, San Carlos City – sky blue ya nan ambalanga tan duyaw ya accent, La union- olive green ya nan stripe na white tan orange, Ilocos sur- green black tan white, Laoag-maroon ya nan-accent na pink tan white, say Pangasinan 1 so akasulong na uniporme ya blue tan white. Legan ya say Host city ya Alaminos ya walay sangkaraisetan ya delegasyon so akasulong na kolor gray ya nan acent ya ambalangan tan blue ya uniporme.
Asumpal so andukoy ya parada na saray atleta tan delegado diad panamegley na sakey ya engranden fireworks display.
