DAGUPAN CITY—Asukayan ya anggapoy permit manlapud Bureau of Fire Protection o BFP Dagupan so ginawang fireworks display diad Brgy Calmay ciudad na Dagupan ya pinmalpak ya sengegan na inkasugatan na 25 totoo kabansag na impangabet na balon taon.
Onong ed BFP Dagupan agga naipatanir ed opisina da so abitlan fireworks display diad abitlan barangay kanyan labay dan naantaan no siopa so angidaulo ed saya tan agmet tampol naipasabid sikara so insedente.
Akabatan ya gaween komon so fireworks display bilang parte na selebrasyon ed pangabet na balon bangbalet saya so pinmalpak.
Say ilalo daray manbabantay so untikyab tan diad tagey so putukan tonya bangbalet bigla labat lan sinmabog diad leksab.
Lapud saya, asakitan so 25 ya indibidwal ya manbabantay. Kabiangan ed saray biktima so ogogaw, matatakken tan pigaran lalaki.
Tampol met iran inawit diad patambalan. Diad kaplesan wala lad maong iran kipapasen legan ya sakey labat lay mansasansia diad ospital lapud pandala na layag to.
