DAGUPAN CITY– Pinakseban na Office of the ombudsman na sakey taon ya suspension so mayor tan vice mayor na Asingan, Pangasinan makalanor ed inpansumlang ed memorandum circular na Department of the Interior and Local Government o DILG.
Onong ed say disisyon, inayunan na ombudsman so reklamo nen councilor Evangeline Durao kontra di mayor Heidi Chua tan vice mayor Carlos Lopez Jr.
Inreklamo nen Durao so impangiyan na saray ngaran tan litrato na saray respondents ed saray balon saliw ya ambulansya diad baley da tan diad saray government projects tan properties kabiangan so inpaniter na saray bags diad saray public schools.
Taloran grounds so impakseb na ombudsman kontra saray duwaran opisyal na baley, inpansumlang ed conduct prejudicial to the best interest of the service, simple misconduct tan inpansumlang ed section 5 A na RA 6713 o say agga impanebat na sulat diad loob na 15 working days.
Kaleganan tonya, diad ekslusibon impituyaw na bombo radyo Dagupan ed kinen vice mayor Lopez Jr. agtoni naawat so abitlan suspension order.
Anggaman untan, akatarya iyan temporaryon unleksab diad puwesto bangbalet iyapila to so nagmaliw ya disisyon ya inpakseb diad sikara.
