DAGUPAN CITY- Indepensa nen Department of Social Welfare and Development o DSWD Sec. Emmanuel Leyco so impangipawit na pabalon ed saray managsigay ya Vietnamese ya pinasempet papawil diad Vietnam kasumpalan ya narel ya man-aalay sira diad dayat ya nasasakupan na baley na Bolinao, Pangasinan.
Diad ekslusibon impituyaw na bombo radyo Dagupan ed kinen sec. Leyco, impaliwawa ton labay da labat lan nasiguron ligtas ya makasempet iraya diad Vietnam.
Pinabalunan ira na kanen tan danum piyan walay naakan da legan iran unbabiyabiyahe diad loob na waloran agew.
Kabiangan ed say inpawit ed sikara so belas, sira, pising, 600 litres ya danum, taba, soy sauce tan arum nira.
Nilinaaw ton saya so humanitarian move ed parte na gobyerno piyan siguruen ya amin ya unbibisita diad bansa so makaalis ya maayos diad bansa da.
Mismon si presidente Rodrigo Duterte so angidaulo na seremonya parad panpasempet diad saray Vietnamese.
No nanonotan, sarar Vietnamese Fishermen ya pinasempet natan ya agew so kaiba di Phan Van Liem tan Le Van Reo ya ibabagan apatey na saray kabiangan na Philippine Navy kasumpalan ya akiusilan diad dayat ya sakop na 54 nautical miles na Bolinao.
Kaleganan tonya, impalapag na opisyal ya akitongtong la ra doad saray Vietnamese government piyan agla naulit iyan agawa diad arum ya pankanawnawa. Imporek ton say daiset ya agga pantatalusan so nepeg ya napantongtongan na duwaran bansa.
