DAGUPAN CITY -Inatey so limaran miyembro na notorious robbery group ya aka-enkuwentro na saray otoridad ya mangerel komon ed sikara kasumpalan ya akilaban diad baley na Pozorrubio, Pangasinan.
Diad eksklusibon inpituyaw na Bombo Radyo Dagupan ed kinen P/Chief Inspector Melecio Mina hepe na Pozzurobio PNP, kinabat irayan sikara di Joseph Agustin, taga baley na Sison , walay kason robbery homicide diad Zambales tan datin akulong diad BJMP Olongapo manlapud 2014 anggad August 2017, Jomar Bonifacio, akulong met dati ed kason illegal drugs, Richard Tacayu, Angelo Arbelleda, na walay kason droga tan kakapaway to met diad kolongan tan sakeya ya Alvin Jay ya tubon Olongapo city.
Akabatan ya nansumpal ed armed encounter so inpanrespondi na saray kabianganan na PNP Pangasinan tan membro na Criminal Investigation and Detection Group (CIDG) Region 1, pian erelen komon so asalitan grupo na saray matatakew ya manbibiktima na saray gasoline station diad Pangasinan tan kaabay iran probinsya ya singa diad Tarlac.
Akabatan ya sampot ya tinakewan na grupo so sakey ya gas station diad Camiling, Tarlac.
Kasumpalan ya naantaan so panaamutan dad baley na Pozorrubio, so tampol ya ginaway operasyon na PNP tan CIDG na nagresulta ed tampolan ya impatey na saranya kayari dan akilaban.
Arekober met diya so nanduruman klase na paltog tan sakey ya andeket ya fortuner ya anggapoy plate number.
Umpapaway met diad imbestigasyon ya saniiba rad BJMP Olongapo tan nen makapaway irad kolongan so nanbuo ra na grupon tinawag ya Arbelleda Robbery Group.
