DAGUPAN CITY– Unkekerew na hustisya so pamilya na sundalo ya manlalapud baley na Urbiztondo, Pangasinan ya inatey diad enkuwentro kontrad grupon Abu Sayyaf diad Patikul, Sulu nen Sabado.
Linma lad Mindanao iray atateng na inatey ya sundalo ya si corporal Oliver Aquino, 29 anyos manlalapud barangay Bayaoas, Urbiztondo piyan mitongtong ed kinen president Rodrigo Duterte.
Onong ed nalan impormasyon, mangagawa na combat operation so militar diad lugar nen naka enkuwentro daray teroristan grupo.
Akabatan ya limay taon ni labat ya sundalo si Aquino.
Akaligtas iya diad Marawi seige bangbalet saya so inatey diad ambush kaiba iray limaran sundalo.
Walay kerew na say pamilya to ed kinen president Duterte ya ipatonton so all out war kontrad saray Abu Sayyaf.
Kinerew da met ya birbiren komon na gobyerno so sakripisyo tan panangaro dad trabaho daray inaatey ya sundalo ya akilaban parad baley.
