Dagupan City– Insilibra natan ya agew na luyag Pangasinan so “Veterans’ Day” piyan naitdan na pagalang so impanengneng ya kabayanian na saray beterano na World War II.
Diad abitlan selebrasyon, ninonot so makasaysayan ya indaong nen Heneral Douglas MacArthur diad Gulpo na Lingayen sa nen 1945.
Si MacArthur, kaiba so arum ya sundalo na Allied Forces, so tinmulong piyan nagamuran na bansa so kawayangan manlapud saray Hapones.
Ginmapo so selebrasyon na “Veterans’ Day” diad sakey ya misa na pisasalamat o thanks giving mass ya dinauloan nen Archbishop Socrates B. Villegas.
Kinabat met diad programa na provincial government iray matatakken ya beterano diad luyag na Pangasinan ya mabilay ni.
Angiter na antikey ya mensahe si 2nd district Representative Leopoldo N. Bataoil parad saray asalitan beterano. Inkuwanton bibirbiren iraya bilang tuwan bayani diad luyag.
Kaleganan tonya, tinangguyor nen Bataoil iray taga Pangasinan ya mankakasakey piyan naipawil so kagalangan ya inpatawir na saray beterano ed say kaplesan ya henerasyon.
