DAGUPAN CITY-Kulong so saninaron suspek ed inpanpatey na asawa na sakey ed saranya kasumpalan na ngalngalin duwaran bolan ya inpanamot diad luyag na Pangasinan.
Naaresto diad Sitio Paten, Barangay Macaboboni, baley na Agno si Joey Ochavez, bente siyete anyos, managsigay tan residente na Barangay Centro Toma diad baley na Bani kaleganan ya naaresto met so ibabagan kabit tonyan kinabat ya si Rosanna Junio, trenta’y dos anyos, residente diad abitlan lugar.
Narel iraya diad panamegley na warrant of arrest ya inisyu nen Honorable Judge Arginald Julius Esguera na RTC Branch 54 diad ciudad na Alaminos parad kason Parricide ya walay petsang September 28, 2017.
Onong ed kinen SPO1 Lareven Opolencia, imbestigador na Bani PNP, say duwara so ituturon nansabwatan ed say inpanpatey ed asawa nen Rosanna Junio ya si Marlon Junio ya arumog ya inkotkot diad sakey ya abot asingger diad uringan to ya kaabay na abong dad Bani nen Agosto diyes na kaplesan ya taon.
Posible konon pinlano na duwara so inpanpatey ed say biktima piyan sikara so makapan-among la.
Akabatana ya masolok sakey taon lan man-aamong iray suspek no iner manaayam irad baley na Agno. Akapanpawilan ni kono so biktima tan say biin suspek bangbalet patuloy ni pinenengnengan to diad kabit to.
Immunad saya, labi na Agosto otso, diad sayan taon, nanpatanir so biktima ed say asawa ton si Rosana ya selselan tan nengnengen to may gagaween ton uring diad nipalandey na Centro Toma, baley na Bani bangbalet agla akapawil anggad nalmuan so laman ton inkotkot asingger ed uringan to nen Agosto diyes.
Inamin met nen Joey Ochavez ya sikato so nanpatey ed say biktima diad panamegley na inpanpekpek ed sikato na suklar diad beneg tan inkotkot diad abot. Ipapasen met ya kasabwat tan posiblen mastermind ed plano so misis na biktima ya si Rosanna .
Akakulong la natan so duwara diad custodial facility na Bani PNP tan anggapo so piyansan nayarin bayaran da parad temporaryon pakapaway da.
