Dagupan City-Inatey so sakey ya laki kasumpalan ya binmangga diad dump truck so niluganan dan motorsiklo diad San Fabian, Pangasinan.
Onong ed mpormasyon na PNP, say insidente so agawa diad karukuyan na kalsada diad Barangay Aramal, San Fabian no iner say motorsiklo ya imamaneho nen Ralph Angelo Dungan, bente kwatro anyos, residente na Barangay Binday diad abitlan baley so binmangga ed kawigin parte na dump truck ya imamaneho nen Johnny Dulay, kwarentay otso anyos, residente na Barangay Mabilao diaad abitlan baley.
Resulta tonya, si Dungan tan say dose anyos y back rider to ya si Ian Kobe Gabriel, residente na Barangay Burgos, Ramon, Isabela, so akagamor na sugat diaad nanduruman parte na laman to.
Inawit ira diad Region 1 Medical Center siyudad na Dagupan, balet inatey la si Dungan.
Kaleganan tonya, wala lad kustodiya nag San Fabian PNP so driver na truck kaleganan ya mangagawa na kaaruman ya imbestigasyon so pulisya ed agawan insidente.
