DAGUPAN CITY– Inatey so sakey ya incumbent councilor ya untatagam ya vice mayor diad baley na Sto. Tomas, Pangasinan.
Kinabat so biktima ya si Councilor Benjamin “Junjun” Oculto ya untagam komon ya Municipal Vice Mayor parad 2019 midterm elections tan residente na Brgy. San Marcos diad abitlan baley legan ya kinabat so suspek ya si Jun Jun Vidal, 40-anyos ya residente ni diad Brgy Hermosa Tepo, Bataan.
Diad nalan impormasyon na Bombo Radyo Dagupan manlalapud Pangasinan PNP, kakapaway na biktima diad Jesus Christ Church chapel ed Brgy. Poblacion tan paunla lad luluganan to nen biglan pinapaltog na suspek tan talora nin kakaiba to ya akalugan na kolor sky blue ya Toyota Corola.
Imbatiok diad ospital so biktima bangbalet indeklaran dead on arrival na say attending physician to.
Kaleganan tonya, nanusilan iray suspek tan pupulis ya nanresulta na impakaerel ed kinen Vidal legan ya saray kakaiba to so akatakas tan patuloy nin aantaen so pikakabat da.
Nala diad podir na suspek so sakey ya M16 rifle ya walau duwaran magazines tan skaey ya magazine na cal 45 tan saray bala.
Diad kaplesan, patuloy so gagaween ya imbestigasyon na PNP ed say motibo ed agawan impamaltog.
