DAGUPAN CITY- Unggapo lan namimigmig so laman na sakey ya akulaw nen adeskubre iya diad loob na rerentaan ton apartment diad baley na San Jacinto, Pangasinan.
Onong ed PNP, say biktima so kinabat ya si Lourdes Clifford, 85 anyos, balo tan manguupa na sakey ya apartment diaa Barangay Guibel ed abitlan baley.
Onong ed imbestigasyon na saray otoridad, sampot ya anengneng so biktima nen November 8, 2018 antes iyan nalmon andi lad bilay diad loob na kwarto to na say kaaro ton si Delia Salinas, 52 anyos tan kaabay ya abong na biktima.
Akabatan ya say biktima so walay sakit ton diabetes tan high blood pressure tan manbobokor ya manaayam diad abitlan apartment.
Gagaween na saray otoridad so amin ya polaing piyan natunton iray kakanayon na biktima piyan naasikaso ya susto so pangitulor ed biktima.
Temporaryon lalamayan so biktima ed sakey ya punerarya diad baley na Mapandan.
