DAGUPAN CITY- Personal na bumisita upang magpaabot ng pakikiramay si Provincial Director Pcol. Rollyfer Capoquian ng Pangasinan Police Provincial Office sa mga naulila ng biktima ng pamamaril na naganap sa bayan ng Sta. Maria kamakailan.
Kasama ng mga tauhan ng Sta. Maria Police Station, isinagawa rin nito ang “reconstruction of crime scene” upang makatulong sa imbestigasyon.
Matatandaan na inabangan at pinagbabaril ng hindi pa nakikilalang suspek ang isang incumbent Barangay captain na sakay ng Barangay Patrol na nagsanhi ng pagkasawi nito sa kahabaan ng By pass road sa Barangay Paitan.
Nauna nang binuo ang Special Investigation Task Group (SITG) para sa masusing imbestigasyon sa insidente dahil ang grupo ay binubuo ng mga eksperto sa iba’t ibang larangan ng pag-iimbestiga, at magsasagawalm ng masusing pagsusuri ng mga ebidensya, pagkuha ng mga testimonya mula sa mga saksi, at pagtugis sa mga posibleng suspek.
Dahil dito, patuloy na hinihiling ni Pcol. Capoquian ang buong kooperasyon ng publiko sa pagbibigay ng anumang impormasyon na makatutulong sa pagresolba ng kaso dahil layunin nito na kaagad makamit ang katarungan para sa biktima at sa naulilang nitong pamilya.
