Dagupan City – Nagsagawa ng opisyal na pagbisita at inspeksyon si PBGEN Dindo R. Reyes, Regional Director ng Police Regional Office 1, sa Binmaley Municipal Police Station at mga Police Assistance Desks (PADs) bilang bahagi ng paghahanda para sa Holy Week Ligtas SUMVAC 2026.
Kasama ni PBGEN Dindo R. Reyes si PCOL Alex D. Fulgar, CRS; PCOL Arbel C. Mercullo, Provincial Director ng Pangasinan Police Provincial Office; at PLTCOL Leonard C. Paredes, Force Commander ng 1st PMFC Pangasinan sa isinagawang inspeksyon upang tiyakin ang kahandaan ng mga operasyon ng kapulisan para sa kaligtasan ng publiko sa panahon ng dagsa ng biyahero.
Sinuri sa naturang aktibidad ang mga pasilidad ng himpilan at mga PADs, gayundin ang pamamahagi ng mga go bag sa mga personnel na naka-deploy para sa Ligtas SUMVAC 2026. Personal ding nakipag-ugnayan si PBGEN Dindo R. Reyes sa mga opisyal at tauhan ng istasyon upang magbigay ng gabay, magbahagi ng mga epektibong pamamaraan, at bigyang-diin ang kahalagahan ng disiplina, pagtutulungan, at mataas na moral sa pagtupad ng tungkulin.
Binigyang-halaga rin sa inspeksyon ang pagpapalakas ng ugnayan sa komunidad sa pamamagitan ng pagpapanatili ng presensya ng kapulisan sa mga pangunahing lugar upang makatulong sa mga biyahero, makaiwas sa insidente, at agad na makatugon sa anumang emerhensiya.
Bahagi ang aktibidad ng patuloy na pagsisikap ng Philippine National Police na mapanatili ang kaayusan, seguridad, at tiwala ng publiko, kasabay ng pinaigting na paghahanda at presensya sa mga lugar na inaasahang dadagsain ngayong Semana Santa.
