DAGUPAN CITY– Inaresto so pituran totoo kaiba so sakey ya Public Order and Safety Office o POSO enforcer diad ginawan operasyon na Philippine Drug Enforcement Agency o PDEA Pangasinan tan PNP Dagupan diad sakey ya abong ed barangay Herrero Perez diad ciudad na Dagupan.
Diad biskeg na search warrant , ginalugad so abong na target na operasyon ya si Alexander Lopez, residente diad abitlan lugar.
Arekober diad abong to iray iinapen ya shabu ya unaabot ed 25 gramo ya mankantidad na ngalngalin sanlasus limamplun libon pesos.
Naaktuan so anemiran lalaki ya manuusar na illegal ya droga diad sakeya ya ibabagan drug den ya walad abay na abong nen Lopez.
Kinabat iray naaresto ya sikara di Alvin Cercado, Mark Mejia Calulot, Marvin de Gracia, Jun Fernandez, Nestea Regacho tan Raymundo Sinlao ya sakey ya POSO enforcer diad baley na Calasiao.
Akumpiska ed saray suspek so pigaran sachet na iinapena ya shabu tan saray drug paraphernalia.
Ginetman untakas iraya balet sansian naaresto ira na saray otoridad.
Kaleganan tonya, itatarya la na PDEA so kason isegep kontrad saray suspek.
