DAGUPAN CITY – Apasal laray Pilipino ya manaayam tan mantratrabaho diad Saudi Arabia ya mandasal no panaon na kuwaresma.
Diad impituyaw na Bombo Radyo Dagupan ed kinen Reynaldo Dulay, 14 taon lan mantratrabaho diad King Abdulaziz Naval Base, tan sikatoy manguuley ed Engineering Division for Operation and Maintenance diad Jubail Saudi Arabia, isesebel diman so mandasal no panaon na kuwaresma.
Inkuwanton, undadalan so Holy Week diman ya singa ordinaryon agew.
Wala met so loob to diad trabaho aliwan singa dia ed Pilipinas ya anggapoy loob diad eskwela tan trabaho piyan makapandasal so totoo.
Anggapoy wala met diman no antokaman so kanen da kumparad Pilipinas ya isesebel so pangan na karne.
Diad biek tonya, apasalan da met la so man-fasting no panaon na kuwaresma singa say gagaween tonya no wadiad Pilipinas.
