DAGUPAN CITY– Impalapag nen Magdalo Representative Congressman Gary Alejano ya walay advantage tan disadvantage so pansaliw na Pilipinas na saray military hardware diad arum ya bansa singa diad Russia tan China.
Diad esklusibon impituyaw na Bombo Radyo Dagupan ed kinen Alejano, impalapag tonya ya likod ed technical specification, compatibility tan inter-operability na say saliwen ya gamit so nepeg nenengnengen no unubra ed say weather condition na bansa tayo.
Importante met ya walay commanality ya say labay ton ibaga saray sistema so ordinaryo tan sarag ton man-inter-operate ed saray abitlan bansa.
Inkuwanto ya no bilang walay nagawan giyera mainumay lay panusar na saray gamit na militar ta say doktrina daranya so nanlapud kaalyadon bansa.
Bangbalet say disadvantage na say pansaliw diad nanduruman bansa so nayarin nanlalaok lamay sinaliw ya gamit ta nayarin agga makapantalusan lapud pandumaan na saray sistema tan doktrina.
Nayari met ya agga natalusan iray specification ya akasulat ed say lenggwahe na bansan angaliwan.
No nanonotan, impalapag nen Department of National Defense (DND) Secretary Delfin Lorenzana ya ikokonsidera da eray bansan China, South Korea, Russia tan Turkey bilang alternative supplier na helicopters parad militar kasumpalan ya kanselaen nen presidente Rodrigo Duterte so $233-M aircraft deal diad Canada.
