DAGUPAN CITY -Ikinagulat at ikinalungkot ng buong Amerika ang pagpatay sa kilalang Trump Ally at Conservative Activist sa US na si Charlie Kirk.
Ayon kay Marissa Pascual, Bombo International News Correspondent sa US, sa panayam ng Bombo Radyo Dagupan, nakakagalit ang nangyari dahil pinatay umano si Kirk dahil lamang sa kanyang mga opinyon na hindi sinasang-ayunan ng iba.
Inilarawan ni Pascual si Kirk bilang isang napakabatang lider, 31 taong gulang, may magandang asawa, at ama ng dalawang maliliit na anak.
Aniya, si Kirk ay kilala sa kanyang husay at pagiging bukas sa talakayan ng iba’t ibang isyu, lalo na sa pulitika at lipunan.
Si Kirk ay tanyag na speaker sa iba’t ibang unibersidad sa Amerika at marami ang naniniwala na siya ang posibleng tumakbong gobernador ng Arizona at, balang araw, maging pangulo ng Estados Unidos.
Bilang isang political activist, author, at media personality, naging co-founder si Kirk ng conservative organization na Turning Point USA noong 2012, kung saan siya rin ang naging executive director.
Nakakadurog ng puso ang nangyari, lalo pa’t kasabay ito ng paggunita ng Amerika sa trahedya ng September 11 attacks.
Sa ngayon, patuloy ang imbestigasyon sa kaso.
Isinasagawa na rin ang door-to-door manhunt upang mahanap ang suspek sa pamamaril.
Matatandaan na nasawi si Kirk matapos siyang barilin habang dumadalo sa isang event sa Utah Valley University.
Tinamaan siya sa leeg at agad na dinala sa pagamutan, ngunit binawian din ng buhay makalipas ang ilang oras.
