Inanunsyo ni Pangulong Ferdinand Marcos Jr. ang pagbubukas ng isang opisina ng Social Security System (SSS) sa Philippine Embassy sa Seoul at ang pagtatayo ng bagong Philippine Consulate General sa Busan.
Ginawa ni Marcos ang pahayag sa kanyang pagpupulong kasama ang mga miyembro ng Filipino community sa Busan.
Ayon sa Pangulo, layunin ng hakbang na ito na mas mapadali ang akses ng mga Overseas Filipino Workers (OFWs) sa mga serbisyong pamahalaan sa South Korea.
Aniya pa, ang bagong SSS office ay magbibigay-daan sa mga Pilipino na magproseso ng benepisyo, magrehistro ng membership, at magsumite ng claims nang hindi na kailangang bumalik sa Pilipinas.
Layunin din ng inisyatibang ito na palawakin ang mga programang pangkaligtasang panlipunan at mapabuti ang akses sa mga serbisyong pamahalaan para sa mga OFWs.
Bukod dito, inihayag ni Marcos na tinatapos na ng Department of Foreign Affairs ang mga paghahanda para sa bagong konsulado sa Busan, na inaasahang magbubukas sa susunod na taon.
Ito ay magsisilbi sa mga Pilipino sa Busan, Ulsan, at Gimhae, at mag-aasikaso ng mga serbisyo tulad ng pagpaparehistro ng pasaporte, civil registry documents, at iba pang consular services.
