Ipina-subpoena ng mga prosecutor ng Department of Justice (DOJ) sina Villar Land Chairperson Manuel Villar, dating senador Cynthia Villar, direktor Manuel Paolo Villar, senador Mark Villar, senador Camille Villar, at iba pang opisyal kaugnay ng reklamong kriminal na inihain ng Securities and Exchange Commission (SEC) laban sa Villar Land Holdings at ilang executives nito.
Ayon sa DOJ, inaatasan ang mga nabanggit na personalidad na magsumite ng kanilang counter-affidavit at iba pang ebidensiya bilang tugon sa mga alegasyon ng SEC.
Bahagi ito ng isinasagawang preliminary investigation upang matukoy kung may sapat na basehan o probable cause para magsampa ng pormal na kaso sa korte.
Nauna nang naghain ng criminal complaint ang SEC laban sa Villar Land Holdings dahil umano sa paglabag sa Securities Regulation Code.
Kabilang sa mga ibinibintang ang market manipulation o artipisyal na paggalaw sa presyo ng shares ng kumpanya, insider trading o paggamit ng hindi pa nailalathalang mahalagang impormasyon upang kumita sa bentahan ng stocks, at misleading disclosures o hindi tama at kulang na pagbubunyag ng mahahalagang impormasyon sa publiko at sa mga mamumuhunan.
Iginiit ng SEC na mahalagang mapanagot ang mga sangkot kung mapapatunayang may paglabag upang mapanatili ang integridad ng merkado at maprotektahan ang interes ng investing public.
Samantala, wala pang detalyadong pahayag ang kampo ng mga Villar hinggil sa subpoena, ngunit inaasahang maghahain sila ng kanilang paliwanag at ebidensiya sa loob ng itinakdang panahon.
Matapos matanggap at suriin ang mga sagot ng mga inirereklamo, magpapasya ang DOJ kung may sapat na batayan upang ituloy ang pagsasampa ng kaso sa korte o kung ibabasura ang reklamo.
