DAGUPAN CITY– Inatey so lider na Malicdem group ya walad beneg na inpanpatey ed pigaran barangay official diad probinsya na Pangasinan diad agawan enkuwentro ed saray pupulis diad barangay Longos Amangonan, baley na San Fabian.
Diad ekslusibon impituyaw na bombo radyo Dagupan ed kinen Police chief inspector Renwick Alamay, hepe na San Fabian PNP, kinabat so suspek ya si Christian Bardarlipe, 28 anyos, tan lider ng Malicdem group ya man–ooperate diad luyag na Pangasinan.
Agawa so enkuwentro niman bandad alas 3:40 na palbangon.
Onong ed kinen Alamay, base ed say record na PNP, sangkot so suspek ed inpanpatey ed sakey ya barangay kapitan diad baley na San Jacinto tan sakey ya barangay Kagawad diad barangay Alacan, San Fabian tan kaiba so sakey nin bii.
Akabatan ya linmaban so suspek ed saray otoridad diad ginawan search warrant operation kanyan benales iyan pinaltog na saray pupulis ya sengegan na inateyan to.
Patuloy ni imbestigasyon ed abitlan insidente.
