DAGUPAN CITY– Inayunan na Korte suprema so disisyon na Court of Appeals ya iyabeba ed simple misconduct so kaso nen datin Pangasinan Provincial administrator Rafael Baraan.
Nilira iya ed say kaso nen Baraan ya walay koneksyon ed ibabagan black sand mining diad probinsya.
Kaleganan tonya, adismiss so kaso ni Engr. Alvin Bigay datin manangidaulo did Provincial Housing Urban Development Council Office.
Immuna lan inekal ed serbisyo si Baraan nen 2014 bangbalet nanhain na petition to review diad court of appeals ira di Baraan tan Bigay.
Inyabeba ed simple misconduct so kaso nen Baraan no iner pansirbian to so taloy bolan ya suspension diad serbisyo.
Diad inyarap dad media, imbaga nen Baraan ya inpasen ton death penalty so plimeron hatol diad sikato lapud inekalan iya na kanepegan ton mansirbi ed gobyerno.
No nanonotan, insegepan so duwara na administrative case nen 2014 lapud ibabagan black sand mining diad baley na Lingayen.
