DAGUPAN CITY – Manlilikna natan na nervous breakdown so ina na pitoy taon ya ogaw ya kaibad saray inatey ed inpantalapos na sakey ya van diad tourist destination na Barcelona Spain nen apalabas ta simba.
Onong ed impituyaw na Bombo Radyo Dagupan diad kinen King Almar Baga, kaanakan nen Mrs. Judith Cadman ya ina na biktima ya si Julian, kinaukulan danin turukan na panpaugip so panginaen tonya lapud kada nanonotan tonya so agawad anak to so mabetbet iyan manakis.
Impalapag nen Baga ya linmad Barcelona so sanina piyan undalo ed kasal na kanayon da pero agla atuloy makasengeg ed say agawa.
Linma labat irad abitlan lugar piyan mangan bangbalet biglan nantagar so ogaw ya manaliw na galaw-galaaw to kanyan apilitan iran umpaway.
Agda ilaluan ya saya so sapitin na biktima ya nakaibad saray tinalapos na asalitan luluganan tan agatin gatinan na saray totoon manlulumbaan ya unalis piyan makaarawid akagawaan na insedente.
Anggaman si Mrs. Cadman so kaiba ed saray asugatan diad sayan insidente.
Unkekerew natan na dasal tan hutisya so kakanayon na pamilya Cadman manlapud baley na San Fabian, Pangasinan .
Akabatan ya si Cadman so walay lahi met ya Pilipino tan alenleneg ton anak so inatey ya ogaw.
