DAGUPAN CITY– Labay na saray unalagey ya ‘foster parents’ na biin Chinese ya angisibo na taho ed sakey ya pulis diad MRT-3 Boni station ya katongtongen iya piyan personal ya unkerew na pirdona.
Diad eksklusibon impituyaw na Bombo Radyo Dagupan ed kinen Oscar Bautista Saplato, tubon Mancup, Calasiao, Pangasinan, labay dan nakatongtong so pulis ya si PO1 William Cristobal piyan unkerew ira na pirdona ed agawaan na anak anakan dan si Jiale Zhang, 23-anyos.
Kinmerew la kono pirdona ed sikara nen Zhang diad agawaan to.
Imbaga dan maong ya ogaw, pala-aral, aga mahilig ed social life tan anggapoy bisyo to si Zhang.
Inyarum tonin labay nen Jiale ya makapansumpal na panaral diad bansa tan agtoni labay so unsempet diad China ta labay tonyan manayam diad Pilipinas ta mabait iray Pilipino.
Immuna ed saya, sinita na pulis ya si PO1 William Cristobal so Chinese national ya si Jiale Zhang, 23-anyos lapud awit to iinumen ya taho ya isesebel diad saray tren na MRT tan LRT.
Bangbalet kaleganan ya manpapaliwa so abitlan opisyal so inyibong na biin chinese dayuhan so iinumen to.
