DAGUPAN CITY- Sinasaksak anggad apatey na sakey ya embes so sakey ya dumaralos diad arapan mismo na say ama to tan anak to diad baley na Sto Tomas, Pangasinan.
Kinabat so biktima ya si Edwin Llagas, residente na Brgy San Agustin legan ya say suspek so kinabat ya si Jerry Pastor, 31 anyos, embes tan residente diad abitlan lugar.
Onong ed impormasyon na kapulisan, kaiba na biktima so ama tonyan si Armando tan anak toyan si Nithan legan ya mansasalog na talon nen sinmabi so suspek .
Anggapoy bengat la, inasinggeran toy biktima tan sinasaksak diad nanduruman parte na laman to na sengegan na tampol ton inateyan.
Tampol met ya naaresto so suspek diad ginawan follow up operation no iner nalad kustodiya tonya so inusar toyan kutsilyo ya walaan na dala.
