DAGUPAN CITY-Binmuwelta si datin Philippine Amusement and Gaming Corporation (PAGCOR) Chairman Cristino Naguiat kasumpalan ya akusahan na sakey ya barangay captain diad Urdaneta City, Pangasinan.
Immuna ed saya, personal ya akatongtong na Bombo Radyo Dagupan si Punong barangay Nel Tablada na barangay Pedro Orata, ciudad na Urdaneta no iner impalapag ton pinasakbayan iya nen Naguiat nen sikara so makapan-abet diad sakey ya ospital.
Diad eksklusibon impituyaw ed kinen Naguiat, inkuwanton untatagam so asawa tonya bilang mayor na abitlan ciudad kanyan pulitika so nanenengneng ya rason na pambabatikos diad sikato nen Tablada ta uusaren to kono so isyu piyan deralen so asawa to ta unbabatik met iyan konsehal diad biek ya partido.
Imburi nen Naguiat iray akusasyon kontrad sikato tan impalapag ton sikato ni so makakaawat na pasakbay diad bilay manlapud kinen Tablada tan wala ray witness ya makapan paneknek ed say tuwan agawa diad ospital.
Onong ni ed si Naguiat, plano ton mangisegep na kason libel n ya mankantidad na P10 milyon kontra ed kinen Tablada makasengeg ta likod ed saray witnes walay emben ton video ya manpapanengneng na tuwan agawa.
Imburi to met ya sikatoy nan-dirty finger ed si Tablada ta maliwliwawa nid sinag na agew ya anggapoy nanengneng diad video na unman ya insidente.
