Manisia si Dr. Carlo Orduna, sakey aya doktor diad luyag na Pangasinan ya posiblen pinmawil so calf tear nen forward star Kevin Durant diad inpawil ton nangalaw ed Golden State Warriors kontra ed Toronto Raptors diad game 5 na NBA finals.
Diad esklusibon impituyaw na bombo radyo Dagupan, impalapag nen Orduna ya naimano ed inpangalaw nen Durant so inpan emben to ed say calf muscle to ya walad beneg na bikking to asingger diad bukong bukong to ya mapatnag ya pinmawil to sakit to.
Impaliwawa nen Orduna ya say calf muscle so konektado ed say Achilles tendon.
Inkuwanto mankaokolan na duwara anggad taloran simba so painawa depende ed say klase na calf muscle tear tan no maminsan unabot ed anggad duway bolan o unsulok ni so pantambal ed saya.
No nanonotan, asakitan so kawigin calf muscle nen forward star Kevin Durant, sa nen Mayo 8 diad galaw da kontrad Houston Rockets.
Imporek ton nepeg ya manpainawa ni si Durant tan aga ni mangagalaw ta no agto alwaran so laman tonya so nayarin magmaliw ya permanente so sayan sakit to.
Nakaokolan ya unpasilong met iya ed MRI piyan nakabatan to no grabe la so injury to.
