Dagupan City– Papagaan ya manpatuloy so itagey na presyo na sira partikular say bangus anggad panaon na pasko.
Saya so impalapag nen Dagupan City Agriculture Officer Emma Molina diad ekslusibon impituyaw diad sikato na Bombo Radyo Dagupan.
Onong ed opisyal, mansasansian atagey so presyo na bangus dad ciudad lapud impakadesyang na saray kailogan lapu metla ed say nantotombokan ya bagyo tan habagat.
Diad sayan kaplesan onong ed si Molina,unaabot ed P180-P195 pesos so kada kilo na angkakabaleg ya bangus legan ya manpresyo na P165, P140 tan P120 so kada kilo na normal ya bangus.
Saya so atagey no ikumpara ed say presyo nen saman ya agga unaabot ed sanlasus pesos so lakuan na per kilo.
Kaleganan tonya, anggaman atagey so presyo, impasiguro na City Agriculture Office ya susto labat so suplay tonya lautla say ciudad so ipapasen ya sangkabalegan ya suplayer na bangus diad interon bansa.
