DAGUPAN CITY – Tinangguyor na Archdiocese of Lingayen-Dagupan iray totoo ya mandasal na ‘Oratio Imperata’.
Diad impaway ya circular nen Lingayen-Dagupan Archdiocese Archbishop Socrates Villegas, kinerew to ed say umbaley ya mandasal na Oratio Imperata kontra ed saray kalamidad kada misa antes na post communion prayer diad lood na limaran bolan ya unggapo ed Hunyo 3 tan mansumpal no Nobiyembre 1.
Onong ed kinen Arch. Villegas, diad saray linmabas ya taon, nanengneng ya lapud inpandasal na Oratio Imperata, agga akaranas so luyag na Pangasinan na graben kalamidad kanyan binmulaslas so sector na agrikultura tan aqua culture.
Say Oratio Imperata so akasalin diad salitan Ingles tan Filipino bangbalet akasalin met iya ed dialekton Pangasinan tan Ilocano.
