DAGUPAN CITY– Anggapo so nagawaan na saray Pilipinon managsigay diad Scarborough Shoal no sikara so segepan so bangka da na saray Chinese Coast Guard tan laen so nala dan sira.
Diad eksklusibon impituyaw na Bombo Radyo Dagupan ed kinen Yoyoy Rizol, sakey ya managsigay ya manlalapud Brgy. Bayambang ed baley na Infanta, Pangasinan inkuwanton anggad nengneng labat so nagawaan da tan agda nagawaan ya sikaray banuen ta umpano manpapapetang iraya.
Impalapag nen Rizol, ya halos amin ya sumisigay ya uunla diad Scarborough Shoal so lalaen na saray Coast Guard na China tan aalaen so inerel dan sira.
Puro mararakep ya sira so ikakarga dad say banyera da tan papanuen dan susto antes ran unalis.
Singa da met imomonitor iray sumisigay ya uunla diman tan no pigaran agew da lad man.
Lapud saya, imbes ya pinabangan so nanaerel dan sira so uunla ed saray Chinese Coast Guard .
