DAGUPAN CITY– Patuloy so gagaween ya search and rescue operation na Philippine Coast Guard parad saray nababalang ya limara nin sumisigay ya apadpad diad West Philippine sea.
Based impormasyon nen Lt. Commander Angeline Mahinay na Philippine Coast Guard PCG-Pangasinan diad Bombo Radyo Dagupan inmalis tan linmad dayat so limaran managsigay pian manalay sira diad dayat ya nasasakupan na West Philippine Sea bangbalet agla akapawil iraya.
Apagaan so pamilya da kanyan sikaray kinmerew na tulong ed say opisina na PCG ya tampolan met ya nangawa na search and rescue operation.
Onong ni ed abitlan opisyal, diad say limaran nababalang ya sumisigay duwara so nanlapud baley na Dasol kaleganan ya talora so nanlapud baley na Agno.
Kinabat met so duwaran sumisigay ya nanlapud Dasol ya sikara di Gon Rivera na Brgy Tambobon diad abitlan baley tan Anecito Cabarlo ya taga Brgy. Osmena.
Legan ya say taloran sumisigay ya nanlapud baley na Agno so kinabat ya sikara di Junior Bisina, 28 anyos, Rosel Miro-37 anyos, tan Rogel Mitunga 52 anyos.
No nanonotan, saray managsigay ya nanlapud Dasol so inmalis sa nen March 8 bangbalet agla ra akapawil nen March 9 ta awalaan na gale warning kanyan apigar so niluganan dan baloto ya sengegan na inpakabalang da.
Legan ya say taloran indibidwal ya nanlapud Agno so nababalang sa ni nen bolan na Pebrero.
Koneksyon tonya, nilinew na PCG Pangasinan ya mitotongtong met lara ed saray asingger ya isla ya posibleng apadparan na saray nababalang ya sumisigay.
