DAGUPAN CITY– Malet ya pinanonotan na Commission on Elections iray binmatik ya kandidato nen apalabas ya May 14 elections ya mansumiti na Statement of Contributions and Expenditures o SOCE.
Diad ekslusibon impituyaw na Bombo Radyo Dagupan ed kinen Atty. Marino Salas, Provincial Election Officer na probinsya ,imbaga ton anggad Hunyo 13 labat la nayarin manhain na Statement of Contributions and Expenditures (SOCE) so amin ya kandidato ed Barangay tan Sangguniang Kabataan.
Inkuwanton, say sakey ya too, analo man o atalo so obligadon mansumite ed saya.
Onong metla ed section 14 na RA 7166 aray analon kandidato ya agga makapansumiti na SOCE ed ingetar ya deadline so agga aboloyan ya makayurong ed pwesto anggad saya so makapansumite.
Akadetalye diad SOCE iray kontribusyon ya naawat na kandidato o partido; aray gastos, aray agga ni abayaran, say nature tan kantidad tonya.
Onong ed ley, walay 30 agew iray kandidato ya manhain na SOCE kasumpalan na eleksyon.
