Muling nagpamalas ng kamangha-manghang husay ang Filipina tennis star na si Alex Eala matapos umabante sa finals ng 2026 Hong Kong Tennis Open na nagmamarka sa kaniyang ikalawang professional circuit final ngayong taon.
Nakuha ng kaniyang karera ang panibagong tagumpay matapos nitong pataubin sa isang matinding laban ang world No. 9 na si Maria Sakkari ng Greece sa skor na 7-5, 3-6, 6-4.
Sa kabila ng mga naitalang weather delays sa gitna ng laro, nagpakita ng matatag na determinasyon si Eala upang maipagpag ang pagkabigo sa ikalawang set at maikasa ang panalo laban sa kilalang manlalaro mula sa Women’s Tennis Association (WTA) Tour.
Ang makasaysayang tagumpay na ito laban kay Sakkari ay itinuturing na career-best win ng dalagang Pilipina hanggang sa kasalukuyan na lalong nagpataas ng kaniyang profile sa pandaigdigang saklaw.
Maalalang nagningning din si Eala ngayong taon nang masungkit ang kaniyang maiden professional singles title sa ginanap na W50 Pune sa bansang India.
Nakatakda namang harapin ng 2022 US Open girls’ singles winner ang Amerikanang si Claire Liu na kasalukuyang bahagi ng top 100 globally para sa inaasam na korona sa Hong Kong.
Ang prestihiyosong torneo na isang WTA 250 event ay lalo pang nagpapatunay na handa na ang atletang Pilipino na makipagsabayan sa mga pinakamahusay sa mundo at magbigay ng malaking karangalan sa bansa.
