Walang naitalang malalaking sunog o structural fire sa bayan ng Mapandan, Pangasinan mula Enero hanggang Nobyembre ngayong taon.
Ito ang ibinahagi ni SF04 Jonathan S. Velasquez, Acting Fire Marshal ng Mapandan Bureau of Fire Protection.
Ayon kay Velasquez, bagama’t wala silang naitalang malalaking sunog sa mga gusali at establisimyento sa nasabing panahon, mayroon pa rin silang nairereport na mga insidente ng grass fire o sunog sa damuhan, gayundin ang pagsunog ng basura at mga palayan.
Dahil dito, patuloy ang paalala ng BFP sa publiko na maging maingat sa paggamit ng apoy at iwasan ang basta-bastang pagsusunog ng mga basura at iba pang bagay na maaaring pagmulan ng sunog.
Samantala, nagpapatuloy din ang kanilang pag-iikot at pag-inspeksyon sa mga establisimyento sa bayan upang matiyak na sumusunod ang mga ito sa mga kinakailangang fire safety requirements.
Kabilang sa kanilang tinututukan ang mga negosyong may mataas na panganib ng sunog, partikular ang mga tindahan na nagbebenta ng mga produktong madaling magliyab at mga establisimyentong nagtitinda o nag-iimbak ng LPG o gasul.
Ayon pa sa opisyal, isa-isa nilang kinokontak ang mga establisimyento upang paalalahanan ang mga ito na mag-renew ng kanilang mga kinakailangang dokumento at sumailalim sa fire safety inspection.
Patuloy namang hinihikayat ng BFP ang mga residente at may-ari ng negosyo sa Mapandan na sumunod sa mga paalala at pamantayan sa kaligtasan laban sa sunog.
Paalala ng ahensya, mahalagang maagapan ang anumang posibleng pagmulan ng sunog upang maiwasan ang pinsala sa ari-arian at higit sa lahat, maprotektahan ang buhay ng mga mamamayan.
Home Local News WALANG NAITALANG MALALAKING SUNOG SA MAPANDAN MULA ENERO HANGGANG NOBYEMBRE; MGA GRASS...










