Inungusan ng Dallas Mavericks ang Houston Rockets, 116-111, sa kanilang paghaharap sa NBA regular season nitong Biyernes, ika-30 ng Oktubre, American time.
Naging dikdikan ang laban hanggang sa huling bahagi ng laro, ngunit nagawang panghawakan ng Mavericks ang kanilang kalamangan upang maitala ang panalo sa harap ng kanilang home crowd.
Naging susi sa panalo ng Dallas ang malaking ambag nina Kyrie Irving at Cooper Flagg. Tumapos si Irving na may 35 puntos at siyam na assists, habang nagdagdag si Flagg ng 33 puntos, siyam na rebounds at anim na assists. Nag-ambag din si Daniel Gafford ng 18 puntos para sa Mavericks.
Samantala, pinangunahan ni Kevin Durant ang Houston sa naitalang 28 puntos, habang may 22 puntos naman si Jabari Smith Jr. Sa kabila ng pagtatangka ng Rockets na makabawi, hindi na nila napigilan ang ratsada ng Dallas sa fourth quarter, kung saan nakapagtala ang Mavericks ng 40 puntos.
Dahil sa panalo, natuldukan ang five-game winning streak ng Houston at naitala nito ang unang pagkatalo sa bagong season. Bahagi rin ang naturang laro ng NBA Cup Group Play.
