Isang makasaysayang tagumpay ang naitala ni Romeo Quinsay ng Pangasinan matapos niyang makumpleto ang 216-mile o humigit-kumulang 350-kilometrong Banaue to Luneta Endurance Challenge Philippines, kung saan nakamit niya ang titulong 1st Runner-Up.
Sa panayam ng Bombo Radyo Dagupan, ibinahagi ni Quinsay ang kanyang karanasan sa matinding karera, ang mga sakripisyong pinagdaanan upang marating ang finish line, at ang layunin niyang maging inspirasyon sa iba pang mananakbo, lalo na sa mga dumaranas ng mga personal na pagsubok.
Ayon kay Quinsay, labis ang kanyang kagalakan at hindi pa rin siya makapaniwalang natapos niya ang 350-kilometrong distansya. Aniya, siya ang kauna-unahang Pangasinense na nakatapos ng naturang ruta sa kompetisyong ito.
Kasama niya sa karera ang mga kinatawan mula sa Negros Occidental, Pampanga, at Catanduanes. Gayunman, higit sa pagkamit ng puwesto sa podium, itinuring niyang tagumpay ang ligtas na pagtatapos ng karera at ang pagtutulungan ng mga kalahok sa kabila ng matinding pagod.
Isa sa mga pinakatumatak na bahagi ng karanasan ni Quinsay ay ang desisyon niyang samahan ang isang kapwa mananakbo hanggang sa finish line, sa halip na unahin ang posibilidad na makuha ang kampeonato.
Ibinahagi niyang pinili niyang makipagtulungan sa kasamang runner, na nakaranas din ng mga hamon habang tinatahak ang mahabang ruta. Para kay Quinsay, mas mahalaga ang makarating silang dalawa sa dulo kaysa makamit niya ang mas mataas na puwesto sa kompetisyon.
Sa halip na panghinaan ng loob sa naging resulta, itinuring niya itong isang tagumpay na kapwa nila pinaghirapan.
