Posiblen unbayag anggad sayan agew so pangipasilong ed yellow alert na Luzod Grid.
Saya so kinompirma nen Red Delola, Assistant Secretary na Department of Energy diad ekslusibon impituyaw ed sikato na Bombo Radyo Dagupan.
Immuna ed saya, nan-abiso karuman Abril 10 so National Grid Corporation of the Philippines o NGCP ya ipasilong ed yellow tan red alert so luzon grid lapud maimpis ya reserban kuryente.
Onong ed opisyal, anggaman walad yellow alert labat ni, agga nepeg ya mankampante so publiko ta posible nin unbayag anggad sayan agew Abril 12.
Makabaliksan tonya, makaranas nin sansia na shutdown tan limitadon generation so pigaran power plants ta uniiral nin sansya so yellow alert.
Kaleganan tonya, agga ni nibaga na DOE no pigara so eksakton bilang na ‘available capacity’ o reserba na kuryente diad Luzon ta man uman uman iya depende ed oras tan demand na aray consumers.
Say anta da lamet kuwanto say bilang na naandi ya inmabot ed 1, 352 megawatts.
Immuna ed saya, impaliwawa na DOE ya say labay ton ibaga na yellow alert so wakay kuryente, bangbalet maimpis labat so reserba lapud atagey ya demand.
