DAGUPAN CITY– Inatey so sakey ya 32 anyos ya managsigay kasumpalan ya manbikkel diad loob mismo na abong da diad baley na Anda, Pangasinan.
Kinabat so biktima ya si Marcos Godila, 32 anyos tan residente na Barangay Siapar diad abitlan baley.
Onong ed imbestigasyon na aray otoridad, umpapaway ya say biktima tan say live in partner to so awalaan na kolkolan diad cellphone lapud ibabagan inkiwala na arum ya relasyon na say kaamong tonya.
Kayari tonya, nan-inuman so biktima tan say agi to.
Nen kasumpalan na inuman, linmoob so biktima diad abong da tan diman la nanbikkel diad panamegley na nylon cord ya insinger to diad kisame.
Inawit so biktima diad ospital bangbalet saya so indeklaran inatey na aray doktor ya nan nengneng ed sikato.
Aggapo so anengneng ya foul play iray otoridad ed say impatey na biktima kanyan ipapasen so kason suicide o panbikkel.
