DAGUPAN CITY– Impasiguro na Commission on Higher Education o CHEd Region1 ya akaalerto so opisina da nilirad papalutangen ya Armed Forces of the Philippines o AFP ya manrerecruit so komunistan grupo na saray estudyante ed pigaran unibersidad tan kolehiyo pian nagawa so “Red October” plot o planon pangekal ed kinen Presidente Rodrigo Duterte.
Saya so impalapag nen CHEd Region1 Spokesperson Danilo Bose diad eksklusibon impituyaw na Bombo Radyo Dagupan.
Inkuwanton, anggaman anggapoy unyan alegasyon so palanang ya akaalerto so opisina da piyan nasiguro so kaligtasan na bawat estudyante.
Bangbalet, onong ed kinen Bose, no napaneknekan ya misasabwatan iray estudyante ed saray komunistan grupo so nayari ran pakseban na dusa o penalty kasumpalan ya undalan ed due process.
Inyarum ni nen Bose, ya lukas so linya na CHEd piyan tugunan iray manlabay ya manreport ed sikara ya walay unyan agawan insidente ed saray Unibersidad tan Kolehiyo diad rehiyon.
